Jacques de Cambrai - Force d'amours me destraint et justice

Gil Def Mar 15 Avr - 19:12

LES OEUVRES DES TROUVERES

Jacques de Cambrai

Force d'amours me destraint et justice
Jacques de Cambrai

I

Force d'amours me destraint et justice
Jolivetais m'ait mis dedans ces lais ;
En resgairdant ai bone amour conquise
Et ta pitiés, ma dame, conquerrais.
Ensi seront mi voloir acompli
D'amors, Dame, et de loiaul amie
S'aurai d'amer la joie et lou solais,

II

Hé ! Cuers hautains, plus ke jerfaus sor bixe
Fais por haïr orguel, et vilains gais,
Dame, ke es de bel acoent aprise
A vos montroi ne me refuseis pais
Et, si je fau jolis cuers a mercit
Trestuit li bien me seront defaillit
Si ert por moi de la mort en porchais.

III

Ne morai pas maix la mort m'iert près mise
Cor i penseis, belle, ensi comme je fais
Elais dolans, ou est or convoitisse ?
Lai où je veul, ke lais n'est-elle pais !
Cor covoitises, belle, je vos empri,
Moi a amer et amors autresi
Ou je dirais : Deus ! de si haut, si bais

IV

Cil est moult haut, ki joie ait entreprise
De bon amor ; mais ceu ne dis-je pais :
Ke fort eur ne soit por moi remise
S'ensi defaut, trop iert pensis, et mais,
Car a premier, Dame, quand je vos vi
Mes cuers, por vos, de moi se departi
Or lou gardeis, je m'en voix, vox le lais.

V

Je tairai donc, Dame, en la votre franchise,
Foi et dousour, o cuers ki remainrais
Tu fus jai miens, soiés en son servixe
Se ne le fais, a tous jors trait m'ais.
Et non porcant, il ne tiens fors c'ali
Siens est ségur si amors ai plevi
Ke en mon cors jamaix ne revanrais.